प्रसिद्ध गायक कुमार कान्छाको जन्म २०१४ मंसिर २८ गते कलकत्तामा पिता मनबहादुर शाह र माता तुलसीदेवी शाहको कोखबाट भएको हो । पिता जागिरको सिलसिलामा दैलेखबाट कलकत्ता पुगेका बेला कुमार जन्मनुभएको हो । उहाँकी एक दिदी पनि  हुनुहुन्छ । उहाँका  श्रीमती र दुइ छोराहरु पनि छन् ।

कुमार कान्छाले नेपालका एक सयभन्दा बढी चलचित्रमा र धेरै कलेक्सन एल्बमका लागि गीत गाउनुभएको छ । 'लाहुरे', 'कोसेली' जस्ता चलचित्रमा अभिनय पनि गर्नुभएका कुमारले चलचित्र बाहेक गाएका नेपाली गीतहरू संगालेर दुई क्यासेट चक्का 'गोरेटो',र  'दोबाटो' एल्बम पनि बजारमा ल्याईसक्नु  भएको छ । कुमार कान्छाले नेपाली, हिन्दी, पन्जावी, बंगाली, उडिया, मराठी, भोजपुरी, मैथिली आदि २५ भन्दा बढी भाषाका एक हजारभन्दा बढी गीत गाउनुभएको छ । 'पीया कर गावँ' नामक चलचित्रमा उत्कृष्ट अभिनय गरेबापत भारतको राष्ट्रियस्तरको पुरस्कार पाउनुभएको छ । 

उस्ताद सुल्तान खाँका चेला कान्छाको पहिलो गीत नेपाली चलचित्र 'साइनो'को 'आमैले भन्थिन् धाराको पानी...' हो । कुमार कान्छाको अन्तिम एल्बम 'साईनो' हो । साईनो चलचित्रको लागि 'आमैले भन्थे धाराको पानी.............' पहिलो गीतको रूपमा गाउनु भएको कुमारले त्यही साईनो चलचित्रको सम्झनालाई अझ प्रगाढ बनाउन र आफ्नो गीत गायनको २५ औं बर्ष पुगेको अवसरमा 'साईनो' नामक एल्बम निकाल्न तरखर गर्दा गर्दै उनको निधन भएको थियो  ।

मेरुदण्ड -स्पाइनल कर्डको उपचार गराइरहेका उनको  मुम्बईको माहिमस्थित एसएल रहेजा अस्पतालमा उपचारत क्रम मा निधन भएको हो। २०६७ माघ ३ गते  सोमबार झन्डै १२ बजे उनले धर्ती छाडेका हुन् । सोमबार साँझै उनको पार्थिव शरीरलाई गोरेगाउँ स्थित घरमा ल्याएर श्रद्धाञ्जलीको कार्यक्रम गरिएको थियो । श्रद्धाञ्जलीमा संगीतकार रञ्जित गजमेर, गायक तथा अभिनेता मुरलीधर, गायिका जमुना शर्मा, संगीतकार शिखर सन्तोष लगायत विभिन्न संघ/संस्थाका प्रतिनिधिहरू सहभागी भएका थिए । उनको सोमबार साँझै दाहसंस्कार गरिएको थियो  ।